> Koneksyon > Google koumanse aplike plan li pou Afrik la

Kronik Teknolojik Koneksyon ak Gotson Pierre epi Harold Isaac an patenarya ak Gwoup Medialternatif

Google koumanse aplike plan li pou Afrik la

Twitter fè yon pèse an Arabi Sawoudit

Publié le mercredi 4 décembre 2013

Yo t ap gade Afrik la tankou yon gwo zòn nan itilizasyon telefòn selilè pandan aksè Entènèt la rete fèb anpil.

Ebyen Google, gwo motè rechèch ki vin envesti annapre nan divès lòt domèn Entènèt, di l ap foure pye l an Afrik.

Se nan Kanpala, Ouganda, sa ap pase. Google pote koneksyon fib optik nan Kanpala pou miltipliye koneksyon epi pou koneksyon yo kab pi rapid. Objektif la se miltipliye kalite koneksyon pa 100 epi aji sou pri yo pou yo kab bese.

Sa kapab yon pwojè pilòt, paske plan Google se rive laji odyans Entènèt la nan tout zòn kote Entènèt la fèb. Rezon an senp. Se rive ouvè pi laj mache piblisite anliy la. Plis odyans, vle di plis lajan nan piblisite sou Entènèt.

N ap jwenn lyen pou plis enfòmasyon, sou paj facebook Koneksyon.

Antouka, se nan moman sa a, premye minis ayisyen an Laurent Lamothe vizite lokal Google pandan l ap fè yon virewon nan Etazini. Yon vizit ki gen objektif pou jwenn yon sistèm kominikasyon ki pi fyab pou Ayiti, dapre kominike ofisyèl gouvènman an.

……….

GOTSON : Sa nou t ap di konsènan Google tale a, valab pou Twitter tou, ki sanble ap fè yon pèse nan sèten mache moun pat atann, Harold.

HAROLD : Efektivman Gotson, si mwen di w’ Arabi Sawoudit premye bagay ki ap vini nan lespri w’ se sètènman pa libète laprès, ale wè pou libète espresyon…

GOTSON : Arabi Sawoudit, Harold, ke nap siyale anpeche fanm kondyi poukont yo. Pou nou montre nou nan ki nivo sosyete sa-a gen pwogrè pou li fè. Dayè nap sonje ke se lòtrejou la-a ke medam yo te sètoblije defye gouvèlman wayom lan pou yo kondyi pou kò yo…

HAROLD : Eben imajine w’, ke se menm Arabi Sawoudit sa-a ki ranpòte lapalm nan sa yo rele to de penetrasyon ak adopsyon Twitter dapre enstiti Peer Reach ki fè etid sa-a pou sit enfòmasyon teknolojik, Mashabl e.

Etid sa-a pran valè moun nan yon popilsayon ki gen yon kont Twitter, apre sa-a li gade ki valè moun nan gwoup sa-a ki sèvi ak kont yo-a (Pou pi piti, yon fwa pa mwa). Se konsa rezilta yo vinn kapab fè moun pantan…

Etazini se peyi ki gen plis kont Twitter omond e poutan, to penetrasyon li se apèn 11% lwen dèyè Arabi Sawoudit, ki li menm a 33%.

Dèyè Arabi Sawoudit ou jwenn tou dabò Indonezi (19%), Espay (14%) ak Venezyela (14%)…

Eske genyen yon lyen ant popilarite Twitter nan peyi sa yo ak nesesite moun yo genyen pou yo boukante enfòmasyon sou rezo sosyal la-a anba yon rejim bout di ? Sa-a, etid la pa di li.

Wap jwenn yon atik sou etid la, sou paj Facebook nou-an…

Pou Koneksyon sete Harold

Mèsi Harold
…….
Anvan nou ale, an nou fè yon pase nan Telesant kominotè Kafoufèy nan Pòtoprens, kote Gwoup Medialternatif ak patnè li lanse fòmèlman aktivite telesant la. Se yon espas ak òdinatè konekte sou entènèt epi zouti miltimedya pou fasilite kominikasyon ak layite konesans.

Pwogram sa a, ki jwenn finasman Inyon Ewopeyèn, ap devlope aktivite animasyon ak fòmasyon sou enfòmatik, sou relasyon fanm/gason, sou pledwaye, ton fason pou devlope espas echanj pou kontribye nan konstriksyon demokrasi nan nivo kominote yo.

Se la nou kontre ak Ludny Pierre-Paul, yon jen fi nan 9èm ane fondamantal ki chita sou òdinatè li.

Koneksyon - 201113 - Google koumanse aplike plan li pou Afrik la by Radio Kiskeya on Mixcloud