> Koneksyon > Yon espozisyon miltimedya nan Pòtoprens

Kronik Teknolojik Koneksyon ak Gotson Pierre epi Harold Isaac an patenarya ak Gwoup Medialternatif

Yon espozisyon miltimedya nan Pòtoprens

Eske Twitter dwe ou lajan ?

Publié le mercredi 13 novembre 2013

Yon espozisyon miltimedya ap fèt aktyèlman nan Pòtoprens. Se « L’odyssée des musiques noires », yon espozisyon sou mizik nwa y ap mache fè plizyè kote nan lemond.

Espozisyon an ki louvri depi 8 novanm nan mize MUPANAH nan Pòtoprens, ap dire jis rive 27 novanm.

Se Enstiti franse an Ayiti, MUPANAH ak FOKAL ki òganize espozisyon sa et se sit entènèt franse mondomix.com ki pwodui li.

Yonn nan moun ki travay anpil nan espozisyon an, se reyalizatè videyo Remi Crépeau, k ap pote kèk detay teknik pou nou.

Remi Crépeau nan Mondomix. Sit la se www.mondomix.com
………

Byen piblik, byen prive ? Kesyon an ap poze pou Twitter, Harold.

Gotson, 6 novanm 2013 ki sot pase la, Twitter rantre nan lawonn labous lan, an gran jan. Tit konpayi rezo sosyal-la bat rekò (kote li tap transije piwo pase 40$ !). Sou mache-an, Twitter vo plis pase 20 milya dola. Pou yon konpayi ki ap mache sou defisi… Se bèl bagay !

An 2008, Facebook te refize achte Twitter pou 500 milyon dola. Yo te twouve li twò chè ! Jodi-a, 5 an apre, li vo 40 fwa lavalè, menm si li pako fè yon goud gany, paske labous se tankou yon jwèt kazino kote wap parye sou gany konpayi-an kapab fè nan kèk ane. Konsa anpil moun nan konpayi-an dòmi pòv pou yo leve rich (trè rich menm !).

E poutan, mwen menm, ou menm Gotson, ki ap founi Twitter ak enfòmasyon ki fè li fè lajan-an, gendwa pa janm wè yon yota nan pil kòb sa yo ki ap pase anlè, twò wo pou yo ateri.

Men si jamè, ou ta vle mande Twitter règleman eben TIME Magazine mete sou pye yon ti fòmil ki pèmèt ou kalkile konbyen Twitter dwe-ou.

Lè mwen mete kont ou an Gotson (@gotsonpierre), mwen dekouvri ke Twitter ta dwe-ou anviwon 280$, alòs ke li ta dwe mwen, mwen menm (@haroldisaac) 7$ dapre valè moun ki ap swiv ou.

Jan nou te di sa anvan, egzèsis sa-a fòse nou poze yon kesyon filozofik… Eske pou nou konsidere Twitter kòm yon byen piblik, osnon yon byen prive.

Si se yon byen prive, eske Twitter pa ta sipoze peye moun ki ap swe pou li yo ?

Lyen-an sou paj Facebook nou-an. Na fè egzèsis la…

Pou Koneksyon sete Harold

Mèsi Harold.
………

Zòrèy nou ak je nou byen louvri, n ap suiv kisa k ap pase nan pwose ki louvri nan Nouyòk sou zafè ki mete fas pou fas Ajans Frans Pres ak fotograf ayisyen Daniel Morel.

Morel te pote plent kont AFP poutèt ajans la te sèvi ak foto li te fè sou tranbleman tè 12 janvye 2010 la san otorizasyon li. Dapre enfòmasyon yo, pwose sa a kab dire 8 jou.

Konekyson - 131113 - Yon espozisyon miltimedya nan Pòtoprens by Radio Kiskeya on Mixcloud