> Koneksyon > Ka gen boulvèsman nan mache kominikasyon sou zile Ayiti a

Kronik Teknolojik Koneksyon ak Gotson Pierre epi Harold Isaac an patenarya ak Gwoup Medialternatif

Ka gen boulvèsman nan mache kominikasyon sou zile Ayiti a

Disparisyon Kamera Tradisyonel

Publié le mercredi 13 novembre 2013

Gwo boulvèsman kab fèt nan semèn oubyen mwa k ap vini yo nan mache telekominikasyon sou zile Ayiti a, epi ki kab gen konsekans sou tout rejyon Karayib la.

Nouvèl ki parèt nan laprès dominiken fè konnen Konpayi telefòn Digicel, ki gen gwo prezans nan Jamayik, Ayiti ak 22 lòt peyi nan rejyon Amerik la, ta ap fwote men l pou rive achte sikisal konpayi franse Orange an Repiblik Dominikèn.

Gen lòt konkiran ki ta pati dèyè sikisal Orange la lòt bò fwontyè, men se non Digicel ki plis site.

Konpayi an ta dispoze ofri yon milya Ewo pou reyalize tranzaksyon sa a, dapre jounal dominiken Listin Diario.

Gen sèlman yon ane edmi depi Digicel te achte konpayi Vwala an Ayiti, ki fè li vin domine mache a nètalkole ak plis pase 80% kliyan ki branche sou sistèm li a.

Si Digicel ta fè afè sa a, l ap konsolide pozisyon l sou zile a, piske l ap ranmase prèske 40% kliyan dominiken yo, ki aktyèlman branche sou Orange.

Sa ta va reprezante gwo avantaj pou konpayi an ki potko foure pye li kay vwazen.

Men nou pa konnen kouman sa kab enfliyanse kominikasyon yo an Ayiti. Èske ta gen nouvo opsyon konpayi an ta kab pare pou ofri apati yon rezo ki ta kouvri tout zile a ?

Sèlman, gen defi tou. Nou sonje kouman kalite sèvis Digicel yo te bese anpil apre li fin pase pran Vwala an mas 2012. Dayè jiskaprezan gen machwè gonfle toujou.

N ap tou siyale gen anpil plenyen tou nan kèk sektè pou sèvis Natcom ap ofri, limenm ki parèt tankou yon lidè nan domèn koneksyon Entènèt la an Ayiti.

Yo siyale nou plizyè pwoblèm, tankou difikilte oubyen lantè koneksyon nan sèten ka, plan ki kab fasilite endividi men ki kab penalize enstitisyon oubyen gwoup, men sitou sèvis alakliyantèl ki pa bay satisfaksyon epi administrasyon ak ekip teknik ki pa reponn pou rezoud pwoblèm kliyan yo rankontre.

N ap suiv.

………..

Konkirans ap devlope san rete ant telefòn ki kab fè foto ak kamera foto menm, Harold.

Gotson, se pa sèlman fason nou kominike ke telefòn selilè ak smatfòn yo vinn chanje. Yo boulvèse yon bann lòt endistri tou…

Jan nou konnen li se pa 2 sèvis aparèy mobil yo founi nou. Ke se swa Bay Lè (Mont), Kalandriye, Mayetofòn, Kanè Adrès, Kalkilatris, Kat Jeyografik, Album Foto epi tou (men sitou) Kamera.

Konsa, jan nou te sispèk sa, vant aparèy foto ak akseswa yo pran anpil baf nan dènye
ane sa yo nan yon peyi tankou La Frans (pa egzanp) alòs ke (paradoksalman) Franse yo ta sanble plis enterese nan koze fè foto.

Imajine w’ Gotson, ane sa-a sèlman vant aparèy kamera yo ak akseswa pran yon so plis pase 20% dapre gwoup GFK Consumer Choices France.

Sitiyasyon-an tèlman grav ke nan sèten peyi, konpayi kamera tankou Canon oblije ap fè reklam pou raple moun kijan yon kamera tout bon, pi bon pase yon kamera telefòn.

Signe des temps…

Dayè Nokia ta sanble ap fè plas li nan domèn kamera de kalite nan selilè, ak Lumia 1020-an ke plizyè ekspè konsidere kòm yon kamera ki vini ak yon telefòn tèlman kalite imaj yo bon.

Pou Koneksyon sete Harold

Mèsi Harold

…………..

Jefò pou fè teknoloji kominikasyon yo antre pi fon nan domèn edikasyon an Ayiti. Gen plizyè pwojè separe k ap fèt sou teren an.

15 novanm k ap vin la a, Òganizasyon Haiti-Futur ap fè demonstrasyon zouti ki rele “Tableau numérique interactif” ki gen pou sèvi nan 1000 lekòl atravè tout peyi a.

Haiti-Futur se yon òganizasyon solidairite ant Lafrans ak Ayiti, k ap reyalize sa li rele yon pwogram edikasyon nimerik nan peyi a depi 2010.

Koneksyon - 061113 - Ka gen boulvèsman nan mache kominikasyon sou zile Ayiti by Radio Kiskeya on Mixcloud