> Koneksyon > Koneksyon tou nèf

Kronik Teknolojik Koneksyon ak Gotson Pierre epi Harold Isaac an patenarya ak Gwoup Medialternatif

Koneksyon tou nèf

Telefòn selilè gen pou tounen mini-sismograf

Publié le mardi 8 octobre 2013

Se twazyèm fwa Koneksyon chanje abiman pandan 13 an. 13 an wi, paske se 3 me 2000 nou te prezante w kwonik sa a pou premye fwa, nan menm plas sa a.

Li te nesesè pou nou te bay kwonik la yon kout plimo. Men se pa sa sèlman, piske se nan sistèm kominikasyon nou, Harold ak mwen nou pase men tou.

Dezòmè, ou pa fouti rate kwonik sa a menm. Apa tout espas nou te deja pataje, kounye a w ap jwenn nou fasilman sou paj FB nou se facebook.com/koneksyon epi w ap kab suiv nou sou Twitter apati adrès @KoneksyonAyiti.

Se yon fason pou nou di w tou posiblite yo la pou nou ogmante entè-aksyon nou epi pou nou rete konekte. Sijè nou pale nan kwonik la, ak petèt sa nou pa abòde tou, ap disponib nan divès espas kwonik Koneksyon an, ki pa radyo sèlman.

Petèt, fòk mwen raple nou tou, travay nou wè k ap fèt la, se toujou yon travay a 4 men malgre gwosè oseyan ki separe mwenmen ak Harold. Abiyaj kwonik la ak tout sistèm ki anplas rive reyalize ant Kanada ak Ayiti granmesi teknoloji yo.

Anfèt Harold, sa fè yon bon valè ane ou rejwenn mwen sou wout sa a, kote jan m te di nan premye kwonik la, chak semèn n ap pote enfòmasyon sou fason entènèt ap evolye nan lemond epi di sa k ap pase sou entènèt. Men, depi lè sa a, nou wè kouman pwogrè yo fèt vit. E jodi a, pi globalman nou pale sou aktyalite teknoloji ak miltimedya.

Harold, mwen pa kache di w, mwen kontan nou kab fè travay sa a pou piblik nou an.

Gotson, sa fè mwen plezi pou mwen kontinye kolaborasyon avèk ou nan nouvo fòma Koneksyon-an

Harold, anvan nou antre nan aktyalite veritableman teknolojik, ou konnen kwonik sa a abòde globalman kesyon kominikasyon tou. E nou sansib anpil, menm jan ak tout jenerasyon Entènèt la, sou kesyon libète lapawòl.

Nan sans sa a, nou pran gwo chòk lè nou wè sou Youtube, menmm jan ak dèmilye nan oditè nou yo, kalte agresyon konfrè nou Rodrigue Lalanne sibi anba men yon sekirite prezidan Martelly 1e oktòb la. Foto ki soti nan videyo a sikile pi vit pase van nan divès rezo sosyal. E, nou konnen tou nan mwens pase 12 èd tan, kont FB ajan sekirite a, Edouard Denis, vin trè koni nan rezo sosyal yo. Ki fè, yon valè enfòmasyon gen tan disponib sou ajan sa a.

Se pa pou ryen yo di, laj lemond ap viv kounye a, se yon laj enfòmasyon.

………..

Alòs Harold, nou konn deja tou sa nou kab fè ak yon telefòn pòtab. Nou pat konnen si li kab sèvi kòm sismograf.

Yon senp ti koudje ap konfime li… Selilè gaye nan tout lari-a. Li sèvi pou fè telefòn (Evidamman), voye SMS, ale sou entènèt, sou Facebook, sou Twitter, li kapab yon bous tou, anfen, anfen…

Men genyen 2 sismològ nan Enstiti Nasyonal Jeyofizik ak Vilkanoloji nan peyi Itali ki wè yon lòt posibilite ak tout pil aparèy mobil sa yo.

Yo wè posibilite pou yo ta tounen dè mini-sismograf…

Paske Gotson, douzan dou, pil nouvo aparèy entelijan yo (tankou iPhone ak Android yo), ekipe ak sa yo rele akselewomèt ki pèmèt aparèy la detèmine nan ki pozisyon li ye, eske li kouche osnon kanpe, eske li ap deplase osnon li la tenfas...

Sismològ yo fè konnen ke an mwayèn, aparèy mobil ki nan lari-a aktyèlman pa genyen gwo sansibilite. Yon iPhone pa egzanp ap sèlman kapab detekte yon tranbleman de tè ki ta va plis pase 5 sou echèl Richter.

GOTSON : Men Harold, kisa ki ta kapab fèt ak tout done sa yo ?

Eben Gotson, nan ka yon tranbleman de tè, tout selilè ki ta fè pati rezo mini sismograf sa yo, ta kapab founi yon kat trè presi, trè rapidman, de kibò tranbleman de tè-a frape egzakteman epi sitou ak ki fòs.

E menm jan sismolog Antonino D’Alessandro et Giuseppe D’Anna note sa, nou apèn ap koumanse reyalize potansyèl aparèy ki chita nan men chak grenn moun ki genyen yo.

Pou Koneksyon, sete Harold

Mèsi Harold. An tou di referans sijè ou fèk trete la a disponib sou paj FB Koneksyon.

Wi, lyen ap disponib sou paj Facebook kwonik lan, sou facebook.com/Koneksyon

Anpalan sou FB, teknisyen rezo a kontinye ap travay pou pote lòt fonksyonalite. Akyèlman y ap devlope yon motè rechèch ki rele Graph Search pou fè rechèch nan tout kontni ki sou rezo a. W a pran referans sou paj FB nou.

Koneksyon - 021013 - Koneksyon tou nèf by Radio Kiskeya on Mixcloud