> Koneksyon > Ayiti nan Somè mondyal sou Byen Sosyal

Kronik Teknolojik Koneksyon ak Gotson Pierre epi Harold Isaac an patenarya ak Gwoup Medialternatif

Ayiti nan Somè mondyal sou Byen Sosyal

Gwo boulvès nan mond enfòmatifk la

Publié le mardi 1er octobre 2013

Pou premye fwa Ayiti patisipe nan Somè mondyal sou byen sosyal, Pwogram Nasyon Zini pou Devlopman (PNUD) òganize atravè lemond sou gwo defi jounen jodi a.

Kesyon teknoloji ak medya te santral nan edisyon ane sa a, ki dewoule nan 55 peyi. Aktivite yo fèt pandan jounen 24 septanm nan nan Inivèsite Kiskeya sou tèm : « kouman pou sèvi ak teknoloji ak nouvo medya yo pou jwenn yon demen miyò epi solisyon pou gwo pwoblèm jodi a ? »

Yon bann pèsonalite nan Inivèsite, nan administrasyon piblik, nan sosyete sivil ak nan medya entèvni nan deba yo, ki touche kesyon sou divès aspè lavi popilasyon an epi evolisyon sosyete a nan domèn teknolojik.

Se nan deba sa yo, plizyè entèvenan fè wè nesesite pou nou sèvi pi byen ak teknoloji ki nan men nou yo. Nou pral tounen sou sa ak konfrè nou Frantz Duval ki te fè konklizyon deba yo.

…..

Pou kounye a, ann pale sou kokenn kout loray ki frape nan mond teknolojik la nan nivo entènasyonal, Harold.

Gotson, mwa Septanm 2013 lan riske rantre nan listwa pou de gwo repozisyonman ki fèt o nivo de gwo moso nan konpayi teknolojik yo. Si tèlman ke nou ta gen dwa di ke se yon veritab revolisyon ki ap dewoule douvan je nou la-a.

2 dènye semèn ki sot pase la yo souke planèt teknolojik la.

Chanjman nou obsève yo riske boulvèse fason nou pral pwodyi ak konsome enfòmasyon anvan lontan.

Konsa 12 septanm ki sot pase la-a, Michael Dell ansanm ak yon gwoup envestisè deside privatize konpayi enfòmatik menm non-an, Dell. Poukisa Michael Dell vle retire Dell sou mache labous lan ? Eben se paske li bezwen kapab opere dè chanjman radikal ki ap difisil pou l’ fè si li douvan je tout moun…

Pwoblèm lan Gotson, sè ke konpayi Dell, ki pa gen twò lontan de sa tap domine kesyon desktop, laptop nan lemond (Sitou nan mond biznis lan) reyalize li ap pèdi pye nan lavant laptop ak desktop douvan tablèt tankou iPad ak Galaxy Tab yo.

Se paske yon ti jèn ki ap rantre nan kolèj osnon inivèsite Ozetazini jounen jodi-a gen tandans pou li senpman achte yon tablèt olye li achte yon laptop. Sa vinn vle di anpil tèt fèmal pou Dell ki pa byen tabli kò li nan mache tablèt yo ansanm ak telefòn entelijan yo.

Laptop pap disparèt demen maten, men prensipal fabrikan li-an gendwa kraze yon kite sa pou li fokis sou koze enfòmatik nan niyaj sèlman, ansanm ak sèvè. Yon siy dè tan.

Dezyèm boulvès nan mond teknolojik la, BlackBerry. BlackBerry fè bèk atè douvan Apple ak Google. Konpayi-an te vo 55 milya dola an 2009, li vo 5 milya dola jounen jodi-a. Li te kontwole plis pase 50% mache mobil la nan lemond an 2009, jodi-a lap madebat ak 3%.

Se Fairfax Financials, yon konpayi asirans kanadyen, ki deside vinn pote BlackBerry sekou nan achte konpayi-an pou anviwon 5 milya dola. Men, dapre sa n’ konprann, lap achte li pou li kapab depatcha-l’.

Menm jounen lendi 23 septanm kote nou aprann, BlackBerry vann bay FairFax, eben Apple anonse yon rekò nan vant nouvo iPhone 5S ak 5C li an. Nan mwens pase 3 jou, li vann plis pase 9 milyon iPhone (Preske menm valè ak popilasyon peyi Dayiti !). Yon lòt siy dè tan !

Men kisa tout brasaj sa yo vle di ?

Òdinatè pèsonèl yo (PC yo) menase. Nan peyi oksidantal yo, mouvman-an pral rive pi vit. Men li rezonab pou nou panse ke telefòn ak tablèt yo ap vinn tèlman pisan nan 5 pwochen lane ki ap vinn la yo, ke yo pral ranplase laptop la. Wap senpman branche yon ekran ak yon klavye sou yo pou travay epi wap debranche li lè ou fini.

E ak anons Apple gen pou li fè an Oktòb sou iPad ak liy Mac li an, se li menm ki riske mennen bal sa-a.

Pou Koneksyon sete Harold

Mèsi Harold

…..

Pou nou anklanche sou pèspektiv sa yo, nan finisman Somè sou byen sosyal 24 septanm nan, Frantz Duval di mwayen yo se yonn, men kontni yo se yon lòt.

Koneksyon - 250913 - Ayiti nan Somè mondyal sou byen sosyal by Radio Kiskeya on Mixcloud