> Koneksyon > Soukous diplomatik zafè Snowden nan pa fini

Kronik Teknolojik Koneksyon ak Gotson Pierre epi Harold Isaac an patenarya ak Gwoup Medialternatif

Soukous diplomatik zafè Snowden nan pa fini

Bòn Fèt Kasèt !

Publié le mardi 1er octobre 2013

Pandan rantre a ap presize nan plizyè sosyete apre yon peryòd vakans ki te cho, nou koumanse ap we gwo konsekans diplomatik sèten gwo evènman ki te retni atansyon anpil moun sou planèt la.

Non tankou non jèn militè ameriken Bradley Maning ki fè gwo revelasyon bay Wikileaks ak konsiltan meriken Edward Snowden ki mete kakachat la deyò sou espyonaj Entènèt Etazini ap fè, te sonnen fò anpil.

Jodi a, yonn nan gwo soukous yo, se desizyon prezidant Brezil la, Dilma Rousseff, pran pou kanpe sou yon vizit li te prevwa fè 23 oktòb nan Etazini.

Yonn nan rezon ki ta fè Roussef pran desizyon sa a, se paske Brezil ta monstre poutèt aktivite ajans espyonaj Etazini yo ta frape Brezil.

Sepandan, semèn sa a menm tou, nouvèl ki soti Wachinton fè konnen yon tribinal ki jije zafè espyonaj yo rele FISA, deklare aktivite Ajans Sekirite Nasyonal ameriken an (NSA), ki an kòz, se aktivite nòmal.

Dapre tribinal la, aktivite sa yo pat vyole entimite pèsonn epi pa gen ankenn konpayi telekominikasyon ki te transmèt done sou kliyan yo bay gouvènman ameriken an.

Bon, se sèten, sa sèlman pap mete tout moun an konfyans.

Okontrè, pami sitwayen ak sitwayèn toupatou, menm jan ak nan milye pwofesyonèl, gen santiman yon va ap fèt sou libète yo. Menm nan peyi ki gen yon tradisyon libète laprès, travay enfòmasyon an gen gwo menas sou li akòz kokenn aparèy siveyans leta mete an plas, granmesi devlopman teknoloji yo.

Yon lòt bò, (pou lejèman chanje sijè), kote teknoloji yo poko pèmèt sa a, tankou an Ayiti, otorite lajistis pa ezite mande jounalis pou bay detay sou sous enfòmasyon yo. Se sa nou wè nan ka somasyon jij Lamarre Belizaire fè Radyo Kiskeya ak Kolaboratè nou Liliane Pierre-Paul semèn sa a.

Kesyon pwoteksyon sous yo ak verifikasyon enfòmasyon yo, se 2 nan pi gwo devwa jounalis yo genyen. Gen plizyè dokiman nasyonal ak entènasyonal ki presize sa, tankou konstitisyon Ayiti, plizyè dokiman prensip atravè lemond : Etazini, Almay, Frans, ak Deklarasyon inivèsèl dwa moun.

Nan milye pwofesyonèl ak demokratik an Ayiti yo, nou klè nou anfas lòt tantativ pou pilonnen libète laprès ak libète lapawòl.

……….

Teknoloji evolye, men jodi a, nou pa kab bliye bon vye kasèt nou yo, Harold.

Gotson, se 14 septanm 1963, ke konpayi Phillips prezante sa tout moun tap vinn rekonnèt a travè lemond kòm Tape K7 pandan omwens 40 lane ki ta pral vini yo.

Nan ane 80 ak 90 yo, ak tout pil walkman ki tap sikile nan lari-a, pa genyen yon moun ki tap vle kwè w’, si ou ta di yo ke gen yon tan ki ta pral rive kote ou ta va ap chache yon vye kasèt pou fè yon te, e ke ou patap jwenn li, yo patap kwè w’.

E poutan, nan plizyè kote sou planèt la, kasèt la vinn disparèt nèt. E kote ou jwenn li toujou yo, se pap pou lontan tèlman lòt sipò pou moun anrejistre son (Tankou telefòn osnon dijital rikòdè), vinn gaye nan lari-a e trè abòdab.

Men malgre sa-a, lavi kasèt-la pa fini pou otan. Paske si kasèt odyo yo ap disparèt ak tout boulin. Riban mayetik ki fè kasèt la, li menm, rete la tennfas.

Poukisa ? Eben se paske, nan enfòmatik, nan koze bakòp pako genyen yon grenn moun ki jwenn yon sipò ki pi fyab e ki pi rezistan pase riban mayetik (Tape).

Sòti nan gwo konpayi tankou Google, rive jouk nan ti konpayi dèyè manman yo tout mete bakòp yo sou tape, pou yo kapab konsève enfòmasyon enpòtan yo pou yon maksimòm tan.

Kididonk, menm si nou pa wè kasèt la ankò, li la kanmenm sou yon lòt fòm, pou kenbe enfòmasyon ki pi sansib ak pi enpòtan yo.

Pou Koneksyon, sete Harold

Koneksyon - 180913 - Soukous diplomatik zafè Snowden nan pa fini by Radio Kiskeya on Mixcloud