> Koneksyon > Gwo rebelyon ap pran pye sou Entènèt

Kronik Teknolojik Koneksyon ak Gotson Pierre epi Harold Isaac an patenarya ak Gwoup Medialternatif

Gwo rebelyon ap pran pye sou Entènèt

Koneksyon ap fè yon kanpe pou mwa Dawout lan

Publié le mardi 6 août 2013

NDLR : Ribrik sa fèt la vèy Edward Swoden rantre sou teritwa ris lan.

GOTSON : Gen plizyè non lemond dekouvri nan jou sa yo. Pami yo gen Bradley Manning, Edward Snowden, epi sa fè kèk tan deja n ap pale de Julian Assange. Tout moun sa yo, yo rele yo disidan Entènèt, poutèt jan yo pase pa Entènèt pou fè gwo denonsyasyon ki boulvèse peyi yo epi chape poul yo… Se sou sa Harold ak mwen, n ap fè yon dyalòg jodi a.

Malerezman pou Bradley Manning, limenm lajistis ameriken gen tan mete men sou li. Se misye ki dèyè dividal enfòmasyon Wikileaks revele nan kab diplomatik yo an 2010. Li fèk jwenn kondanasyon li, Harold.

HAROLD : Efektivman Gotson, Bradley Manning riske pase rès vi li ap fè chawa nan prizon menm si sou pil ak pakèt akisazyon ki te tonbe sou do li yo nan kou masyal, apre li te finn devwale kalite skandal kab diplomatik ak lòt dokiman, te revele sou politik amerikèn nan lemond eben li evite sak tap pi lou-an, ki se akizasyon ke li te "Ride Lènmi" ki tap garanti misye yon anprizonman a vi makònnen ak dezonè tretriz.

Kididonk yon viktwa moral pou Manning ak patizan li yo, men pi lajman laj ke sa, pou nenpòt ki moun ki ta tante leve lavwa sou sa yo wè ki pa sa, ki pa kòrèk nan yon òganizasyon kote yo ap evolye sa yo rele an angle : Whistleblowing (Denonsiyasyon).

Konsa, analis yo wè ke jij la pase yon mesaj : Manning fè yon krim (nan vòlè enfòmasyon sekrè epi distribye li) men li pa yon trèt.

GOTSON : Alòs fòn di administrasyon Obama-a, trè anbarase ak kòz sa, paske koze Manning lan divize peyi-an ant sa ki kwè nan metòd boutdi yo pou kontwole lemond, ak sa ki kwè nan prensip libète, egalite ak fratènite. N ap siyale petisyon te sikile pou apiye Manning, menm an Ayiti. Men, ka Manning lan, se pa sèl ka gouvèlman Ameriken-an ap jere, Harold.

HAROLD : Efektivman Gotson, kesyon Edward Snowden-an pako regle. Misye toujou bloke nan ayewopò Moskou-an, menm si demach yo ta sanble pozitif pou li ta rantre ofisyèlman sou teritwa Ris lan anvan lontan.

E paske ka sa, se yon patat cho pou administrasyon Obama-a tou, siyal ki ap soti Ozetazini yo, mi-fig, mi-rezen, tankou vèdik Manning lan.

Konsa, minis Jistis Etazini-an, Eric Holder, fè konnen li pap mande la pèn de mò pou Snowden si misye ta deside rann tèt li…

GOTSON : kesyon espyonaj la parèt nan reyinyon ALBA ki fèk fèt an Ekwatè kote premye minis Ayisyen Laurent Lamothe patisipe. Prezidan ekwatoryen an, Rafael Correa, mande, apre revelasyon Snowden nan, kisa òganizasyon rejyonal la OEA ap fè ?

Harold, pou fini nou pap bliye Julian Assange …

HAROLD : Assange li menm toujou fèmen nan anbasad Ekwatè depi preske 1000 jou. Pou misye, anba pa monte, anwo pa desann. Tan ap pase e nou aprann dènyèman ke Meri Lond-lan depanse plizyè milyon dola pou barikade misye andedan anbasad lan toulejou. Dayè Majistra Lond-lan Boris Johnson, tap plenyen desa.

GOTSON : Men fenomèn denonsiyason, disidans entènèt lan, pa sanble vle kanpe la. Dayè gen yon pirat enfòmatik ki mouri nan kondisyon dwòl semèn sa-a Harold :

HAROLD : Efektivman Gotson, Barnabe Jack, ki te yon White Hat (Chapo Blan) ki vle di yon bon pirat, fè vwèlta pou peyi san chapo, nan kondisyon dwòl. Se yon zanmi li, ki dekouvri kadav misye nan apatman li San Francisco. Lapolis pako detèmine kòz lanmò-an men otopsi ap fèt, menm si pap gen rezilta anvan yon mwa.

Men sak fè lanmò sa pi dwòl se paske, Barnabe Jack, jèn banj 35 an sa-a, te genyen pou li te fè de gwo manman revelasyon jounen jedi premye out lan nan yon konferans pirat enfòmatik Black Hat (Chapo Nwa - Michan Pirat yo) sou de gwo fay sekirite nan sistèm sante ameriken-an espesyalman nan kesyon kontwòl a distans aparèy tankou PaceMaker (Ki ride moun ki fè kè).

Saw tande-an entènèt lan pran dife e ap denonse yon konplo nan koze lanmò sa-a.

Men ka sa-a vinn grefe tèt li sou syisid Aaron Schwartz epi anprizonman lony pleyin Jeremy Hammond ki te founi enfòmasyon bay Wikileaks tou…

Rive nan nivo sa-a, nou ka pale de yon fenomèn disidans.

GOTSON : Mèsi Harold. Ban m tou anonse tout moun pou mwa out la n ap fè yon kanpe. N ap reprann kònn lan an Septanm.

HAROLD : Mèsi Gotson, bòn vakans, mwen sèten ke mwa ki ap vini yo pap piti nan aktyalite teknolojik la.

Koneksyon - 310713 - Gwo rebelyon ap pran pye sou Entènèt by Radio Kiskeya on Mixcloud