> Kreyòl > Petisyon yon gwoup entelektyel ki leve kanpe kont kanaval gouvèlman-an ap (...)

Kanaval 28 jiyè

Petisyon yon gwoup entelektyel ki leve kanpe kont kanaval gouvèlman-an ap òganize sòti 28 pou rive 30 jiyè kap vini la

Pou entelektyèl yo dat 28 Jiyè-a se jou premye debakman blan Meriken nan peyi-a li pa ka jou banbòch. Pou yo Kanaval 28 jiyè se krache sou memwa pèp ayisyen

Publié le dimanche 21 juillet 2013

Pòtoprens, 10 jiyè 2013

Kanaval 28 jiyè se krache sou memwa pèp ayisyen
Nou menm sitwayen ayisyen ki siyen petisyon sila a estomake gouvènman an chwazi dat 28 jiyè a ki se anivèsè Okipasyon ameriken (se 28 jiyè 1915 merin ameriken yo te antre nan peyi a) pou dat inogirasyon Kanaval dè flè li a.

Pas ankò gouvènman an chwazi depanse nan kanaval alòs gen bezwen lajan pou òganize eleksyon e pote solisyon nan pwoblèm popilasyon an k ap soufri. Pas ankò gouvènman an bliye oswa fè kòm si li bliye nan ki kontèks gouvènman Divalye a te vin ak lide kanaval dè flè a.

Men pou li chwazi dat 28 jiyè se manke respè pou sitwayen ki te konbat premye okipasyon an, se manke respè pou peyi a ki bezwen reflechi ki jan pou li soti anba okipasyon n ap viv jodi a. Jounen 28 jiyè a se yon jounen refleksyon ak souvni li dwe ye, pou sa pa rive ankò.

Nan yon peryòd tout moun nan peyi a ap leve vwa yo pou mande depa MINISTA, si prezidan an, premiye minis la, minis Edikasyon nasyonal la, minis Kilti a ak tout gouvènman an wè se banbòch dat senbolik sa a merite, yo gen dwa fè l an prive, men yo pa gen dwa mobilize resous peyi a pou vòlè dwa nou pou sèvi ak dat sa a pou nou reflechi sou listwa n ak reyalite n ap viv jodi a.

Nou mande pou gouvènman an chwazi yon lòt dat pou òganize kanaval dè flè a.
Nou mande medya yo pou prezante nan dat sa a emisyon ki gen karaktè istorik ak pedagojik, ki ankouraje refleksyon sou sans jounen 28 jiyè a.

Nan non moun ki te konbat Okipasyon an. Nan non timoun yo nou pa gen dwa leve nan liyorans ak lendiyite.

Pierre Buteau
Georges Castera
Syto Cavé
Lyonel Trouillot
Evelyne Trouillot
Guy Gérald Ménard
Mireille Pérodin Jérôme
Michel Philippe Leurbours
Wooly Saint Louis Jean
Fritz Deshommes
Jean Lhérisson
Kettly Mars
Josaphat Robert Large
Jean Hénold Buteau
Guertchang Bastia
Lovely kermonde Fifi
Coutechève Aupond
Olsen Séïde
Luckens Legros
Lise Darline Ménard
Sadrak Charles
Jean Mino Paul
Stéphane Linouze Barthélemy
Cherlson Ermoza
Divenson Daltrius
Marc Endy Simon
Jhon Picard Byron
Paule Andrée Louis Byron
Makenzy Orcel
Rodney Saint-Eloi
Rolando Etienne