> Koneksyon > Enfòmasyon sou sistèm ameriken pou espyone Entènèt pran lari

Kronik Teknolojik Koneksyon ak Gotson Pierre epi Harold Isaac an patenarya ak Gwoup Medialternatif

Enfòmasyon sou sistèm ameriken pou espyone Entènèt pran lari

O3B pwomèt pou li bay planèt la entènèt rapid, bon mache

Publié le mardi 9 juillet 2013

Anpil vag diplomatik nan jou sa yo akòz revelasyon Edward Snowden, enfòmatisyen ameriken sa a, sou espyonaj Etazini ap fè, atravè « National Security Agency (NSA) ». Patikilyèman sistèm ki rele PRISM ki pèmèt gouvènman ameriken suiv tout mouvman sou Entènèt.

Mwen pa ensiste sou istwa Snowden nan. Mwen sèten nou tande l deja. Yon Ameriken 30 an, ansyen anplwaye NSA ki mete yon bann kaka chat deyò sou espyonaj Etazini, atravè jounal Washington Post ak jounal angle The Guardian. Poutèt sa, Ameriken dèyè l pou arete l. Li nan ayewopò Moscou kote li bloke epi l ap mande azil politik.

Dapre revelasyon yo, PRISM la, se tankou yon gwo skanè k ap kopye tout sa k ap pase sou Entènèt. Sitou nan sit pi dè milyon moun ap itilize tankou
AOL, Apple, Facebook, Google, YouTube, Microsoft, Skype, Yahoo, eksetera. Se yon sistèm k ap fonksyone depi 2007. Dapre menm enfòmasyon yo, yon sistèm menm jan an tabli tou an Angletè.

Zafè sa a fè nou sonje Julian Assange, ki toujou bloke nan anbasad Ekwatè nan Lond, anba menas arestasyon ak depòtasyon. Misye te fè gwo revelasyon sou kominikasyon atravè rezo diplomatik ameriken nan anpil peyi.

Jodi a, misye leve lavwa anfavè Snowden nan yon atik espesyal ki parèt nan jounal « Le Monde ». N ap jwenn li sou www.lemonde.fr.

……..

Èske nou kab gen espwa yon jou tout popilasyon peyi pòv yo ap kab konekte sou Entènèt, Harod ?

Gotson, genyen yon revolisyon ki ap pase sou tèt nou la, e anpil moun pako reyalize sa, men sa pap pran twòp tan.

Non, mwen pap pale de Edward Snowden ki ta va sou yon vòl pou li ale an Amerik Latin, map pale pito de yon revolisyon ki pral vinn sou nou nan kesyon aksè òdpòt a entènèt otvitès E bon mache…

25 jen ki sot pase la, konpayi Greg Wyler-an, O3B (The Other 3 Billion ki vle di Lòt 3 milya moun ki ap viv sou planèt la) voye 4 satelit nan lespas pou pote entènèt gwo kalib ak bon mache bay popilasyon ti peyi pòv yo.

Greg Wyler ki te dekouvri gwo ploblèm koneksyon ti peyi pòv yo pandan yon vwayaj an Afrik, pwomèt vitès koneksyon ki ap konparab ak sa ki disponib nan peyi oksidantal yo.

Anpil detay poko disponib men anpil obsèvatè ap swiv deplòtonnay sa deprè paske potansyèl lan estraòdinè.

Pou Koneksyon sete Harold

Mèsi Harold

……..

Pandan n ap fini, an n fè konesans ak sit ki rele « voussaveztout.com ». Se yon sit enfòmasyon an dirèk ki fèk parèt nan Montpellier. Editè a, Thierry Boussarie, prezante l ban ou kòm yon esperyans tou nèf an Frans.

Mèsi Thierry Boussarie. Se yonn nan entèvyou n ap kab suiv an totalite nan yon seri Estra Koneksyon n ap prezante w sou Radyo Kiskeya apati lendi 8 jiyè a 11 :30 nan maten.

Koneksyon - 030713 - Enfòmasyon sou sistèm ameriken pou espyone Entènèt pran lari by Radio Kiskeya on Mixcloud