> Koneksyon > Premye Minis Erdogan akize Twitter

Kronik Teknolojik Koneksyon ak Gotson Pierre epi Harold Isaac an patenarya ak Gwoup Medialternatif

Premye Minis Erdogan akize Twitter

Apple ap vini ak iTunes Radio

Publié le mardi 11 juin 2013

Nan aktyalite teknolojik semèn lan :

Premye Minis Peyi Tirki akize Twitter kòm baz aryè revòlt ki ap boulvèse peyi l’ lan depi plizyè jou.
Dimanche pase, Premye Minis Erdogan monte sou televizyon pou li di jan Twitter sete yon menas pou la Tirki.
Se vre ke anpil mobilizasyon fèt sou rezo sosyal yo pou defann tou dabò pye bwa ke gouvèlman-an ta pral rache pou fè plas pou bati yon kokenn chenn batiman nan Istanbul.
Lè moun yo al manifeste, se depatcha lapolis depatcha yo. Anpil moun pran foto evèlman yo ak kamera selilè yo, saw tande-an nouvèl la pran lari pou li, epi rès planèt la al pran sa kap pase-a nan bon ti-mamit sou Twitter.
Depi lè sa-a, foul moun sanble nan plas Taksim toulejou pou denonse gouvèlman boutdi Erdogan lan ki sanble pèdi kontwòl evèlman yo.
Dirijan sa yo, sanble pa apran leson revolisyon arab la te bay, lè yap trete Twitter tankou yon menas. Listwa montre li, inyorans sa-a pa bay dimil opsyon. Akize Twitter pap fè moun sispann pran lari. O kontrè.

— 

Yon lòt pa, apre li finn revolisyone mizik, fim ak liv, Apple pral atake nan semèn ki ap vini la yo radyo ak Apple iRadio, dapre tout rimè ki ta sanble vle konfime douzandou.
Nou pa bezwen enkyete nou, se pa radyo tradisyonel lan ke li pral manyen men pito de gwo moso nan zafè radyo fèt-e-founi tankou Pandora.
Pandora se yon sèvis ki rasanble kalite mizik ou renmen yo epi jwe yo pou ou san ou pa bezwen achte osnon stoke yo. Li pèmèt ou tande sa ou renmen tande, pandan li ap fè ou dekouvri lòt mizik ou kapab renmen.
Natirèlman sèvis sa disponib nan zòn kote ou kapab jwenn bon jan koneksyon entènèt òdpòt.

— 

Finalman, seyans konvokasyon Premye Minis Laurent Lamothe nan Palman ayisyen-an fèt an 2.0 menm 3.0 a sèten moman. Konsa, jounalis ap twit pandan sesyon-an, senatè ap twit pandan sesyon an, atò Premye Minis lan ap twit tou pandan sesyon an. Menm si dinamik lan enteresan, eske li akseptab pou moun ki ap fè yon gwo rankont enpòtan konsa, chita ap Twit olye yo konsantre yo sou sa yap fè-a ?

E menm si ta gen yon lòt moun ki ap twite nan plas yo pandan seyans lan, eske se yon bon lide pandan ke tout peyi ap swiv sa wap di sou radyo ak tele ?

Pou Koneksyon sete Harold

Koneksyon - 050613 - Premye Minis Erdogan akize Twitter by Radio Kiskeya on Mixcloud