> Koneksyon > Plizyè pwojè fib optik pou konekte Karayib la

Kronik Teknolojik Koneksyon ak Gotson Pierre epi Harold Isaac an patenarya ak Gwoup Medialternatif

Plizyè pwojè fib optik pou konekte Karayib la

Konatel ap fè demach pou gen nouvo lwa pou sektè telekominikasyon-an

Publié le mardi 28 mai 2013

Yon lòt fwa ankò se dèy nan mond medyatik la an Ayiti, ak lanmò Pierre-Richard Alexandre, korespondan Radyo Kiskeya nan Sen Mak. Konfrè a mouri 20 me apre li te fin pran bal 17 me. Fanmi li, Radyo Kiskeya ansanm ak tout kòporasyon an ap tann limyè fèt sou lanmò sa a, nan yon kontèks kote jounalis mouri deja anba bal epi atak vèbal ak agresyon fizik fèt sou laprès.

…….

Jounen mondyal telekominikasyon ak sosyete enfòmasyon, se te 17 me pase. Nan okazyon sa a, Konsèy Nasyonal Telekominikasyon (KONATEL) konfime demach pou gen yon nouvo lwa pou sektè a ap vanse.

Nan entèvyou li bay, direktè KONATEL la, Jean-Marie Guillaume, fè konnen dokiman an fin prepare, li depoze nan Ministè Travo Piblik anvan gouvènman an voye l nan palman an.

Depite ak senatè yo ap gen pou panche sou dokiman an ak anpil atansyon pou kab veye sou enterè sosyete a, pèspektiv pwogrè ak enterè demokrasi nan domèn telekominikasyon an.

Otorite yo di lwa sa a ap pèmèt yo jere sektè telekominikasyon an, paske li pi kadre ak devlopman sektè sa a gen ladan l.

Lwa sa a dwe ranplase lwa ki gen kounye e ki pote dat 1977.

……..

Yon nouvo pwojè fib optik lanse nan Karayib la. Se konpayi
angle “Cable and Wireless Communications” ak antrepriz “Columbus Networks” ki baze nan Babad, ki mete pwojè a sou pye pou kapab table 42,000 kilomèt kab pou konekte 42 peyi nan Karayib la, men tou nan Amerik Santral ak Etazini.

Fò n di Columbus deja table yon gwo rezo ki touche yon bann peyi nan rejyon an, men Ayiti pa nan rezo sa a, dapre grafik sit “Columbus Networks” la prezante.

Yon lòt mouvman k ap fèt se nan peyi ki fè pati Altènativ Bolivaryen pou Amerik yo ALBA, ansyen prezidan venezyelyen Hugo Chavez te kontribye fonde.

Dènye enfòmasyon yo fè konnen pwojè sa a, ki dwe konekte Venezyela, Jamayik ak Kiba, ap vanse. Espè entènasyonal anonse yo detekte siyal sou branch kab ki konekte Kiba ak Jamayik la, apre tès te fèt deja depi koumansman ane a sou branch koneksyon ak Venezyela a. Men poko gen enfòmasyon ofisyèl ki soti Kiba sou kesyon sa a.

Se depi 2010 travay yo te koumanse pou pase 1800 kilomèt kab fib optik anba lanmè. Yon pwojè estratejik pou peyi Kiba ki anba anbago ameriken depi yon senkantèn ane.

Nan koumansman yo te pale sou yon lòt faz pwojè a, ki ta dwe konsène Ayiti ak Repiblik Dominikèn.

Koneksyon - 220513 - Plizyè pwojè fib optik pou konekte Karayib la by Radio Kiskeya on Mixcloud