> Koneksyon > Èske Entènèt se yon menas ?

Kronik Teknolojik Koneksyon ak Gotson Pierre epi Harold Isaac an patenarya ak Gwoup Medialternatif

Èske Entènèt se yon menas ?

Sondaj Radio Kiskeya ak AudioNow

Publié le mardi 26 mars 2013

Wi, èske Entènèt se yon menas tout bon ? Antouka, se lide Julian Assange. Nou wè kilès ? Se nèg ki envante Wikileaks, sit ki mete yon bann enfòmasyon diplomatik deyò sou dives dosye ki konsène relasyon gouvènman ameriken ak lòt gouvènman nan lemond.

Nan yon entèvyou Assange bay Radyo “Europe 1” an Frans, li konsidere “Entènèt se pi gwo menas kont sivilizasyon sa a.”

Deklarasyon grav. Misye pale konsa nan okazyon premye sòti yon liv li fèk ekri ki rele "Menace sur nos libertés : Comment Internet nous espionne, comment résister".

Semèn pase nou t ap abòde kesyon siveyans sou Entènèt la. Se aspè sa a sitou ki sanble mennen Assange nan konklizyon sa a. Misye pale sou tout kalte enfòmasyon pèsonèl k ap sikile sou Entènèt pandan tout enstans pouvwa ak sektè ekonomik epi komèsyal twouve yo anndan rezo a tou.

“Li enposib pou fè yon separasyon ant monn modèn nan ak Entènèt”, dapre Julian Assange, ki fè kwè nou ta anba “siveyans total” gwo konpayi espyonaj. Paske, enfòmasyon an vin tankou petwòl.

Nan lòt entèvyou li bay, Assange, ki jwenn azil politik an Ekwatè, di kare bare Entènèt la twouve l anba kontwòl ameriken epi rezo sosyal yo ap kolabore ak Washington.

……

Odyans Radyo Kiskeya atravè Entènèt fèk patisipe nan yon sondaj enpòtan, Harold.

Gotson, Radio Kiskeya nan tèt kole ak AudioNow mennen yon sondaj nan kominote ayisyen ki ap viv Ozetani an, atravè nimewo telefòn Radio Kiskeya genyen ak AudioNow Ozetazini. Kout sonn sa-a te pote sou koze kontwòl zam fann fwa Ozetazini, depi masak ki te fèt nan lekòl elemantè Sandy Hook ane pase-a.

Rezilta sondaj sa Gotson, trè enteresan, kòm se youn nan ra fwa ke nou reyisi gen rezilta siyantifik sou opinyon Dyaspora Ayisyen-an Ozetazini. Konsa nou aprann, ke kominote-a
vle yon ranfòsman lwa sou kesyon zam Ozetazini nan yon wotè 97%.

62% pa kwè ke pwofesè ta dwe mache ak zam nan sal klas.
88% kwè ke fòk yo ta bani zam militè ak chajè gwo kalib.
95% mande pou yo ta fouye istorik moun ki vle vinn achte zam.

Mwen gen sou liy lan, Alexandra Moe, lakay AudioNow, ki te pilote sondaj sa - Alex, poukisa nou enterese nan sa kominote Ayisyèn lan gen pou li di ?

Nou panse, ke si nou kapab atire atansyon piblik la, sou pwoblèm kominote Dyaspora yo ap fè fas Ozetazini, (tankou pwoblèm zam) nap rive kreye yon platfòm ki ap rantre nan medya de mas yo, epi eseye amelyore politik piblik yo.

Mèsi Alex.

Gotson, lòt enfòmasyon ki sòti nan sondaj sa, se ke pwoblèm ki ap domine kominote-a se koze imigrasyon (33%), travay (28%) epi anfen, krim ak vyolans (17%).

2 lòt bagay enteresan, Dyaspora ayisyèn lan Ozetazini sanble damou Prezidan Obama. Yo apiye politik prezidan-an a 96%. Men sa ki pi enteresan, sèke 47% repondan yo tal vote nan dènye eleksyon yo.

Globalman chif yo montre n’ ke kominote-a vle yon kontwòl sere nan zafè zam Ozetazini, ke Dyaspora-a aktif politiktman men ke petèt li bezwen plis òganize pou l’ pran bon jan pwa nan echikye politik Ameriken an.

Sondaj sa te fèt sòti 14 pou rive 21 fevriye 2013 la sou yon echantiyon 405 repondan. Se konpayi Hart Research ki chita nan Washington D.C. ki konpile done yo pou AudioNow ak Radio Kiskeya.

Pou Koneksyon sete Harold

Mèsi Harold
……….

Epi 3èm edisyon fwa teknolojik E2tech se pou 29 me k ap vini la a. Asosyasyon ayisyen pou teknoloji enfomasyon ak kominikasyon (Ahtic) ki toujou òganize evenman sa a, fèk anonse sa a. Fwa a ap chita sou tknoloji, enèji ak anviwonman.

Koneksyon - 200313 - Èske Entènèt se yon menas ? by Radio Kiskeya on Mixcloud