> Koneksyon > Siklòn Sandy bat rekò sou Facebook

Kronik Teknolojik Koneksyon ak Gotson Pierre epi Harold Isaac an patenarya ak Gwoup Medialternatif

Siklòn Sandy bat rekò sou Facebook

Yon tanpèt frape konpayi Apple tou

Publié le mardi 6 novembre 2012

Kit se an Ayiti, kit se Ozetazini… Se Sandy ki domine aktyalite-a ak
valè moun li pote ale nan peyi san chapo, valè bagay li kraze sou wout
li... men valè pwen li fè sou Facebook tou.

Efektivman, anplis dega li fè, Sandy bat yon rekò sou Facebook lè li
vinn dezyèm evèlman moun plis diskite pandan ane 2012 lan sou sit Mark
Zuckerberg la.

Statistik yo deja disponib e yo montre, kare bare, ke Sandy fè 8.34
sou barèm "Talk-O-Meter" an (Ke nou ta gendwa rele Palab-O-Mèt) sou
sit konpayi-an.

Ki evèlman ki rete nan tèt palmarès sa-a ? SuperBowl 2012 lan ki te
mete, fas pou fas, Patriots New England yo ak Giants New York yo.

Toujou dapre Facebook se nan eta Konektikèt ke moun yo plis sèvi ak
rezo sosyal la pandan evèlman-an. Pawòl ki te plis pataje ? "We are OK"
ki vle di "Nou kòrèk"…

— 

Pandan Sandy tap frape kot Ès lan, eben yon lòt tanpèt li menm tap
frape kot Wès la. Pi presizeman nan vil Cupertino nan eta Kalifòni, ki
se kote syèj sosyal planèt Apple lan chita.

Konpayi Steve Jobs lan, mande Scott Forstall pou li mare brisak li, pou li ale.
Men kilès ki Scott Forstall lan egzakteman ?

Eben si ou genyen yon iPhone nan men ou, se Scott Forstall ki dèyè
program ki ap woule sou aparèy la, sistèm operasyon iOS 6 (Ansanm ak
tout lòt ki te vini avan yo)

Kisa ki fè gwo moso sa oblije mare pakèt li ? Eben lè Apple te sòti
nouvo telefòn li an, iPhone 5 lan, ansanm ak nouvo sistèm operasyon li
an, iOS 6 lan, konpayi Steve Jobs lan te deside sispann sèvi ak
teknoloji Google pou sa ki gen awè ak kat jeyografik yo, pou li fè
pwòp sistèm pa li, ansanm ak konpayi GPS olandè Tom-Tom.

Rezilta : Anpil machwè gonfle kay itilizatè yo, ki vinn rankontre yon
dividal pwoblèm nan nouvo kat sa yo : tankou yon bann kote vinn chanje
plas, pat genyen entegrasyon planifikasyon bis ak metro ankò,
elatriye…

Bagay la te rive nan yon pwen, ke PDG konpayi-an, Tim Cook, te
sètoblije vinn fè mea culpa li, epi rekòmande pwodyi lòt konpetitè pou
kalme wounou-wounou itilizatè yo.

E se la konfli an eklate ant Tim Cook ak Scott Forstall paske menm si
se Forstall ki te dèyè nouvo pwogram tèt chaje-a, li derefize mete
siyati li sou lèt eskiz sa-a ke Tim Cook voye bay planèt la.

Se la ke Tim Cook di se twòp atò e mande misye pou li mete l’ deyò.
Ki enplikasyon rebrasaj sa ? Eben anpil analis panse ke li te nesesè
paske Forstall te genyen yon gwo pwoblèm karaktè. E rimè yo te
pèsistan sou difikilte li te genyen pou li te entegre ekip dirijan
konpayi-an. Gen rimè ki menm fè kwè ke misye te konn pat vle prezante
nan reyinyon yo, pa egzanp.

An menm tan, misye te genyen tout konfyans Steve Jobs, e si li klè ke
misye pap ni tonbe nan mizè ni rete nan chomaj twò lontan, Apple ap
oblije montre kouman li pral ranplase yon gwo moso konsa. Se preske
sèten ke lòt konpayi tankou Google ak Samsung pral dewoule yon tapi
wouj "an ò" pou eseye rale misye vini lakay yo…

Rale ti chèz ba nou…

— 

Poun fini, map envite nou fè yon ti refleksyon sou fenomèn rezo sosyal
yo. Yon zanmi mwen semèn sa deside fèmen kont Facebook li an paske li
twouve Facebook se yon bagay twò atifisyèl ki fè moun pa pale youn ak
lòt ankò…

Dapre ou, eske li se zanzi m’ toujou ?

Pou Koneksyon sete Harold