> Koneksyon > Pi gwo konpayi telefòn peyi a ap voye move siyal

Kronik Teknolojik Koneksyon ak Gotson Pierre epi Harold Isaac an patenarya ak Gwoup Medialternatif

Pi gwo konpayi telefòn peyi a ap voye move siyal

CRTC bloke Bell nan acha Astral Media-a

Publié le mercredi 31 octobre 2012

Enkyetid ki te manifeste depi kèk semèn parapòta move siy ki te parèt sou fizyon Digicel-Voilà a vin konfime.

Alòske 2 rezo yo vin fè yonn, anba labanyè Digicel, anpil moun ap plenyen pou move kalite sèvis. Kit se ansyen kliyan Voilà, kit se moun ki te toujou kliyan Digicel, yo nan tèt chaje pou kominike.

Pou kounye a, dapre reskonsab Digicel, plis pase 500.000 ansyen abone Voilà deja pase sou rezo Digicel la. Gen plizyè santèn milye lòt ki gen yon telefòn nan men yo ki pa vo anyen.

Semèn pase deja, nou te enimere an lon e an laj, divès pwoblèm ki poze nan operasyon sa a epi pwoblèm sa bay, nan yon moman kote telefòn pòtab la vin yon zouti esansyèl nan kominikasyon rapid.

Nou konnen Digicel vin yon pwa lou sou mache telefonik la ak plis pase 4 milyon abone, ki fè anviwon 80% mache a.

Èske sa bon pou mache a jisteman ? Kesyon an sou tapi a. N a jwenn yon repons talè pandan n ap pataje enfòmasyon sou plizyè kesyon, Harold.

Gotson,semèn lan te chaje kou Legba :
- iPad Mini an sòti
- Ayiti fè pati, endikatif rejyonal yon lòt peyi...

Men pou nou kòmanse, ann tou dabò pale w’ de Konatel Peyi Kanada, CRTC, ki rann yon gwo desizyon sou kesyon monopole semèn pase-a.

Konpayi telekominikasyon Bell Canada, BCE, ki tap liyen yon gwo moso nan zafè medya O Kanada (Astral), jwenn ak zo grann li lè CRTC-an mete pye li atè pou refize tranzaksyon an.

Konatel peyi Kanada-a voye yon siyal klè lè li fè konnen ke tranzaksyon sa-a pa tap sèvi enterè kanadyen yo ansanm ak konpetisyon-an.

Fòn di w’ Gotson, ke desizyon sa-a se rezilta plizyè mwa diskisyon, deliberasyon andedan endistri telekominikasyon-an, nan mitan popilasyon-an, elatriye.

E tout madebat sa-a, sete poutèt Bell Canada (BCE) ta pral genyen 42.7% mache anglofòn lan ansanm ak 33.1% mache frankofòn lan o Kanada. Sa ki ta va bali yon pozisyon dominan pa rapòt a lòt konpetitè yo.

— 

Nan yon lòt dosye, plizyè itilizatè selilè aletranje remake ke lè yon moun rele yo a travè yon telefòn Digicel apatid Ayiti, genyen yon endikatif an plis ki vinn grefe tèt li sou 509 peyi Dayiti-an. Endikatif sa se 876.

Lè nou fouye pou nou wè, nou jwenn ke endikatif sa-a se pou peyi Lajamayik. Kòm ki dire, apèl sa yo, non sèlman pase pa Lajamyik pou yo sòti, men yo pran endikatif peyi-a tou, sa ke plizyè analis konsidere tankou yon souflèt anplis, pou diyite pèp nou.

— 

Anfen, Gotson, Jan rimè yo te vle li, e jan bri-an ap kouri depi apre iPhone 5 lan
sòti-an, Apple sòti yon iPad Mini.

Mwen pa kache de diw Gotson, ke Steve Jobs do ap vire nan sèkèy li, lè
li tande nouvèl sa. Se yon opsyon li pat janm konsidere, se yon
posibilite li te voye jete kare bare… E poutan men jodi-a, apèn 1 an
apre li finn mouri, konpayi li te fonde-a, ke li rale sòti nan fayit
pou l’ fè l’ vinn konpayi ki vo plis sou latè beni, trayi l’…

Men plizyè analis tonbe dakò pou di ke reyalite mache-a te twò fò sou
konpayi kalifòni-an ki sètoblije rantre nan wonn ke Samsung ak Google
ap domine aktyèlman.

Konsa, Apple entwodyi yon aparèy, iPad, ki pi
piti pase sa nou konnen deja-an men ki pi gwo pase yon iPhone.

Nou kapab panse ke Apple vle bouche yon twou ki riske koule
konpayi-an. Menm si yon rapò montre itilizatè Google Android yo ak
Samsung Galaxy yo (Ki woule Android tou) soufri anpil pou jwenn
mizajou. Men mache telefòn mobil entelijan yo se nan men konpayi Koreyèn Samsung li ye.

Men Apple ap liyen yon lòt matelòt tou, ki se Microsoft ki lage l’
kòl nan batay sa tou ak tablèt Surface ke li mete an prevente semèn pase-a.

Kòm ki dire, fen mwa oktòb sa-a, trè aktif.

Pou Koneksyon, sete Harold

Drapo Ayiti monte wo nan yon konkou sou kesyon edikasyon ak teknoloji nan Wachintonn, Etazini. Se kowalisyon 3 enstitisyon “Haïti Futur-ESIH-Fondation Fière Haïti” ki ranpòte konkou "All Children Reading".

Se ajans èd entènasyonal gouvènman ameriken USAID, ajans èd gouvènman ostralyen AustralianAID ak òganis World Vision.

Nan konkou sa a, yo te vle rekonpanse pwogram ki vini ak nouvo fòmil pou fasilite timoun ak jèn aprann li.

……..

Epi yon kanpay ap dewoule depi kèk semèn nan rezo sosyal yo kont blakawout an Ayiti. Moun sou Facebook ak Twitter mobilize pou omwen jwenn yon kalandriye previzyon sou kote k ap gen blakawout. Haschtag referans la se #EDHBlackout.