> Koneksyon > Yon sant kiltirèl vityèl ap koumanse fonksyone nan ministè kilti

Kronik Teknolojik Koneksyon ak Gotson Pierre epi Harold Isaac an patenarya ak Gwoup Medialternatif

Yon sant kiltirèl vityèl ap koumanse fonksyone nan ministè kilti

Veye sa nap di sou Twitter

Publié le samedi 4 août 2012

Yon sant kiltirèl vityèl, sa vle di k ap sèvi anpil ak mwayen nouvèl teknoloji yo, tanmen aktivite l depi kèk tan nan ministè kilti. Se yon estrikti ki kanpe granmesi finansman Inyon Ewopeyèn.

Sant kiltirèl vityèl la, se yon espas ki aladispozisyon atis, jèn, jounalis ak chèchè epi li òganize fòmasyon ak animasyon sitou nan domèn teknoloji ak miltimedya.

Plizyè santèn jèn sitou patisipe 29 jen pase nan yon jounen pòt ouvèt sant kiltirèl vityèl la te òganize nan ministè lakilti. Nan okazyon sa a, nou pwofite pale ak Dominique Domercant, animatè sant la.

Dominique Domercant, animatè Sant kiltirèl vityèl, ki tabli nan kad koperasyon ant leta ayisyen ak Inyon Ewopeyèn.
…………..

Jiskaprezan Twitter te parèt yon espas libète total kapital, men sanble sa kab pa rete konsa, Harold.

Gotson veye sa wap di sou Twitter. Non men seryezman, si wap viv Ozetazini se yon konsiderasyon ou gendwa oblije fè depi jij Matthew Sciarrino, nan lakou Nouyòk, deside òdone medya sosyal la pou li founi enfòmasyon sou yon moun an patikilye.

Si jijman sa-a konfime nan pi gwo enstans peyi-a, sa ta pral vle di ke Twitter ta gendwa sètoblije founi tout twit moun sa ta va efase, li tap oblije bay adrès IP li, adrès imel li epi ki kote moun lan te ye lè li te ekri twit sa.

Anpil traka.

Twitter deja di li pral konsidere opsyon li, sa ki jeneralman vle di li pral eseye fè kase jijman sa-a.

Nan mitan koze-a, yon manifestan, Malcolm Harris, ke yo te arete 1er Oktòb 2011 sou Brooklyn Bridge lan ansanm ak 700 lòt moun, nan kad manifestasyon Occupy Wall Street yo.

Twitter mande respè pou la vi prive Harris.

Jij la, li menm, di twit Malcolm Harris te efase yo se dè done piblik ki gendwa ede ankèt la. Pou li menm pa gen vi prive ki tyèn lè tout planèt la kapab li twit yo.

Kilès ki gen rezon ?

Koensidans ? Twitter ap swiv tras Google nan pibliye rapò transparans li, menm jounen lendi sa.

Top 4 peyi ki mande Twitter founi enfòmasyon sou sitwayen :
Etazini, Japon, Wayom Ini ak Kanada

Pou Koneksyon sete Harold

Mèsi Harold
………….

Guyana ap pare pou pase nan koneksyon Entènèt sou fib optik. Se nan mwa out premye eseyay yo pral fèt sou 560 kilomèt kab, dapre enfòmasyon ki soti nan medya peyi sa a, ki twouve l nan rejyon Karayib la.

Gouvènman an espere lè kab sa a ap fonksyone y ap kab fasilite yo mete soupye pwojè yo genyen pou mete nan chak fanmi yon òdinatè pòtab ki konekte an rezo.