> Koneksyon > Kesyon sekirite konsène rezo sosyal yo tou

Kronik Teknolojik Koneksyon ak Gotson Pierre epi Harold Isaac an patenarya ak Gwoup Medialternatif

Kesyon sekirite konsène rezo sosyal yo tou

Facebook ap liyen timoun yo

Publié le samedi 16 juin 2012

Nou tap gade sa semen pase, kesyon sekirite an liy nan konteks gwo
devlopman teknolojik k ap fèt san rete, vin pi konplèks.

Kounye a, moun k ap antre sou Entènèt oubyen k ap sèvi ak Teknoloji
enfòmasyon ak kominikasyon yo fèt pou konsyan de sa, epi pran
dispozisyon apwopriye, dapre Robert Guerra, Konseye Senyò nan Citizen
Lab, yon òganis kanadyen ki espesyalize nan sekirite enfòmatik.
Lòt jou nou te ensiste ak li sou telefòn selilè. Men, sou tout rezo
yo, menm rezo sosyal yo, nou fèt pou pran prekosyon, Robert Guerra.

Si nou enterese fouye plis sou kesyon sekirite enfòmatik la, m ap
raple nou adrès Citizen Lab, se www.citizenlab.org

……………

Pou sa k konsène rezo sosyo yo, nou konnen Facebook antre nan labous,
men zafè li pa bon ditou, piske aksyon li yo ap bese san rete. Kounye
a, rezo a ap devlope lòt strateji pou atire sitou adolesan yo, Harold

Facebook ap plonje dèyè ti lezanj ki gen mwens pase 13 an yo

Efektivman Gotson, nan kad tout madebat Facebook ap sibi dènye semèn sa yo, konpayi Mak Zuckerberg lan, ki parèt ap plafonnen ak 900 milyon moun sanble vle liyen timoun piti yo ki (Fòk nou admèt li tou !) pou la plipa deja sou rezo sosyal mondyal la.

Dayè ane pase, Consumer Report te fè konnen ke Facebook te deja genyen plis pase 7.5 milyon timoun ki genyen mwens pase 13 an sou li ! Sa ki kont règleman konpayi-an.

Nad marinad, timoun fè mikalaw e fenk kare ap taye banda sou rezo sosyal la.

Kòm envestissè lage nan kò Facebook jou sa yo, konpayi-an ap chache posibilite kwasans, kou chen fou. Li vinn sètoblije konsidere opsyon li pat priorize avan : E la-a nap pale natirèlman de timoun yo.

Dapre Wall Street Journal, Facebook ta va ap konsidere yon vèsyon sekirize sit lan kote granmoun tap responsab kont timoun yo.

E enpòtans sekirite-a demontre semèn sa, lè nou aprann ke videyo makab ki ap montre jan Luka Rocco Magnotta ta va ap depatcha kadav etidyan chinwa Jin Lun, ap sikile libe libè sou Facebook, kote plizyè timoun, sitou nan peyi Kanada, ap gade l’.

Kwakilanswa Facebook rete kwè li ka al chache plis itilizatè konsa men sitou, li wè posibilite pou li tou andyoze timoun yo pou yo tou rete sou sit la lè yo vinn granmoun.

Anpil tèt chaje.

Pou Koneksyon, sete Harold

Mèsi Harold

…………...

Nouvo sabotaj rezo Natcom an Ayiti. Depi 29 me pase, anpil kliyan
konpayi sa a ki twouve yo nan Delma ak Petyonvil pa rive jwenn sèvis
akòz sabotaj ki fèt sou rezo a nan 2 komin sa yo. Zak sa yo ap repete
depi lè konpayi an koumanse operasyon l an Ayiti an 2010. Natcom, se
nouvo konpayi ki kreye, le konpayi vyetnamyen Viettel achte 60% nan
aksyon ansyen konpayi leta Teleco, ki limenm tou te konn victim anpil
sabotaj.