> Koneksyon > Grèv etidyan nan pwovens Kebèk

Kronik Teknolojik Koneksyon ak Gotson Pierre epi Harold Isaac an patenarya ak Gwoup Medialternatif

Grèv etidyan nan pwovens Kebèk

Valè Facebook nan labous ap degrenngole

Publié le mardi 29 mai 2012

Gwoup pirat enfòmatik Anonymous menase gouvèlman pwovens Kebèk lan nan peyi Kanada.

Poukisa Anonymous deside vare sou gouvèlman kebekwa-a konsa ? eben se akòz reyaksyon gouvèlman pwovens kebèk lan te genyen douvan yon kokenn chenn mouvman grèv etidyan ki ap dire depi plis pase 100 jou.

Pou kisa yap fè grèv la, eben se paske Gouvèlman Premye Minis Jean Charest-an deside ogmante frè ekolaj inivèsite yo plis pase 75% sou 7 lane ki ap vini la yo.

O debi, gouvèlman-an pat fè twòp ka de boulvès ak wounou-wounou ki tap bouyi nan mitan etidyan yo, men lè bagay la kòmanse vinn mangonmen ak manifestasyon lony playin toupatou toulèjou nan pwovens lan, gouvèlman-an vinn deside negosye ak etidyan yo.

Lè negosyasyon yo vinn gate, gouvèlman pase yon lwa dijans ki vinn sentre bas etidyan yo ansanm ak rès sosyete-a nan dwa yo genyen pou yo manifeste ak dwa grèv ki te egziste nan peyi-a depi dik dantan.

Saw tande-a, se lwil ki vinn vide sou dife, bagay la vinn pi cho toujou, e se la nou ye jodi-a.

Se nan kad sa, ke Anonymous decide frape gouvèlman Kebekwa paske li di li pa respekte dwa kebekwa yo pou yo manifeste, sitou ak amann sale ke lapolis pral bay koulyeya si yon moun pa di kilè, kijan, kibò li pral manifeste, omwens 8è alavans

Konsa Anonymous fèmen sit entènèt ministè edikasyon-an ansanm ak sit entènèt ministè sekirite piblik lan e pwomèt pou li kontinye ofansiv lan anvan lontan.

Men se pa sèl aspè teknolojik grèv sa genyen, paske menm jan sa te fèt nan Prentan Arab lan, mobilizasyon sa ke yo rele Prentan Erab lan li menm (An referans a pye bwa nasyonal la) chita sou Facebook, Twitter ak YouTube.

Kare wouj lan, yon senbòl ki sanble ak yon katon wouj etidyan yo leve pou bare ogmantasyon frè skolè yo, gaye sou entènèt la.

Tout manifestasyon yo koòdone sou Twitter ak Facebook epi yo jwe yo sou YouTube.

Chèn televizyon inivèsite Konkòdya-a li menm mache chak swa nan manifestasyon yo ak etidyan yo epi retransmèt mach yo an dirèk sou entènèt.

Anpil obsèvatè kwè ke gouvèlman-an te byen konte men mal kalkile kriz san parèy sa, ki ta vle sanble ak yon revolisyon sosyal ki riske pote li ale.

Menm obsèvatè yo kwè tou ke grèv sa revele yon gouvèlman ki dekonekte ak jenès la. Yon egzanp, lè gouvèlman bezwen esplike rezon ki fè li adopte lwa spesyal 78 lan ki vinn sentre bas manifestan yo, li achte gwo espas nan jounal alòs ke ti jèn ki ap manifeste yo pa li jounal men sèvi, an majorite, ak telefòn entelijan, Twitter, YouTube ak Facebook.

— 

Palan de Facebook, Rien ne va plus ! Facebook ki te antre an penpan nan labous Vandredi pase, ak yon valè 104 milya de dola ap degrenngole. Valè konpayi Zuckerberg la, pase de 38$ l’action a anviron 31$ l’action mèkredi aprèmidi, sa ki fè li pèdi anviwon 16 milya dola.

Dayè ankèt louvri Ozetazini pou detèmine si Bank Morgan Stanley pat kache enkyetid li te genyen konsènan vrè valè Facebook sitou ke se li menm ki te youn nan pi gwo atizan antre Facebook nan labous.

Pou anpil envestisè jodi-a, modòd la se manman pitit mare vant.

— 

Finalman, LaFrans ap fè yon veritab revolisyon nan zafè vòt, kote diaspora fransèz la kapab vote koulyeya sou entènèt.