> Koneksyon > SuperBowl ane sa bat yon rekò sou Twitter

Kronik Teknolojik Koneksyon ak Gotson Pierre epi Harold Isaac an patenarya ak Gwoup Medialternatif

SuperBowl ane sa bat yon rekò sou Twitter

Prezidan Martelly gen yon blòg sou Huffington Post Québec

Publié le jeudi 16 février 2012

Gotson fè yon ti deplase e se mwen menm Harold ki ap avèk nou jodi-a.

Nan aktyalite teknolojik lan semèn sa, ann pale tou dabò de kokenn
chenn evèlman medyatik ki fèt wikenn pase-a nan vil Indianapolis,
Indiana, Ozetazini kote ekip foutbòl zèpòl kare Nouyòk Giants yo, tap
twoke kònn ak New England Patriots yo ki yo menm baze nan vil Boston.

Tankou sa fèt chak ane, SuperBowl lan se yon evèlman televizyon gwo
kalib ki rasanble plis pase 100 milyon telespektatè. Kòm se youn nan
pi gwo evèlman tout peyi-a rasanble pou l’ gade, tout pi gwo konpayi
yo ap goumen pou reklam yo pase ladann. E kòm spot 30s lan koute
anviwon 3.5 milyon dola, yo bat pou yo fè spot ki pi enteresan ak pi
orijinal posib pou tout pil kòb sa, pa al gaspiye. Se konsa tradisyon
reklam SuperBowl lan vinn demare.

Men douzandou, evèlman-an vinn yon evèlman entènèt tou, kote se dife
Twitter te rete pou li pran dife tèlman moun tap twit pandan match la.
12,000 twit a la seconde, yon rekò pou yon evèlman spòtif. E nou kapab
imajine sa lè, dapre Google, 41% moun ki tap gade match la, tap navige
sou entènèt sou mobil yo an menm tan. Yon "Première" nan listwa.

Ane sa, se Nouyòk Giants yo ki genyen koup lan gras, an pati, a yon
ayisyen ki ap evolye nan NFL lan, misye rele Jason Pierre-Paul.

Lòt evèlman medyatik semèn lan, se Prezidan Martelly ki vedèt yon
jounal tou nèf ki parèt sou entènèt nan pwovens Kebèk e ki rele
Huffington Post Québec. Arianna Huffington, ki te fonde sit entènèt
HuffingtonPost.com nan lane 2005 Ozetazini anonse ke Prezidan Martelly
pral youn nan bloggè vedèt li yo (Sa vle di ke li pral ekri atik pou
yo mete sou sit la).

Fòk nou di ke HuffingtonPost Quebec te fè yon wounou wounou nan
pwovens lan apre li te finn envite plizyè pèsonalite kebekwa vinn ekri
pou sit li-a, paske li te mande yo vinn travay gratis. Men yon
majorite nan pèsonalite sa yo te derefize bay teks gratis sou sit la
paske yo te konsidere ke yo ta pral bourike pou yon konpayi ameriken,
ki deja chaje ak lajan, ka galonnen. HuffingtonPost se yon pwopriyete
konpayi entènèt AOL.

Anfen, se jisteman sou HuffingtonPost lan ke nou aprann ke plizyè
kazino nan pwovens Kebèk lan gen entansyon sèvi ak yon teknoloji òdpòt
rekonesans figi pou yo veye moun ki pa kapab sispann jwe jwèt kazino.

Konsa, lè yon moun ki gen pwoblèm adiksyon rantre nan kazino-yo e ke
aparèy la rekonèt figi yo li ap voye yon siyal bay gad sekirite yo pou
yo vinn pran l’ epi mete l’ deyò.

Pou Koneksyon sete Harold