> Actualité > Plizyè òganizasyon bat chalbari dèyè pouvwa PHTK ak yon konpayi pou fè zam li (...)

Haiti-Dénonciations

Plizyè òganizasyon bat chalbari dèyè pouvwa PHTK ak yon konpayi pou fè zam li fenk fòme

Publié le Thursday 28 May 2020

Jedi 28 me 2020

Biwo Avoka Entènasyonal yo (BAI), Konbit Oganizasyon Politik Sendikal ak Popilè yo ak MOLEGHAF pran nòt pouvwa sanginè-konwonpi PHTK a pran yon ansanm mezi pou rete nan tèt Leta a nèt ale, tankou : kontinye fè kat Dèmalòg pandan kowonaviris ap simaye toupatou nan peyi a, kontwole katye popilè yo ak gang ame, sòti yon dekrè divalyeris pou toufe libète piblik yo epi remobilize menm konsèy elektoral ki sot akouche modèl dirijan konwonpi n gen la yo, nan dènye koudeta elektoral ak vyolans ame 2015-2016 yo, pou kontinye fè eleksyon-seleksyon.

Sa ki pi grav la, yon dokiman ki soti anba chal nan jounal ofisyèl peyi a nan dat 7 janvye 2020 an, jounal monitè, anonse kreyasyon yon konpayi ki espesyalize nan fè zam sou teritwa nasyonal la. Konpayi sa a pote non « HAITI ORDONANCE FACTORY, S.A (HOFSA) ». Ta sanble se bawon PHTK yo ki itilize yon seri prèt non pou reprezante konpayi an. Pami moun ki reprezante konpayi kriminèl sa a, nou ka site : Patrick GANTHIER, Elodie HERARD ki se ti sè Dimitri HERARD ak Carl-Fréderic MARTIN.

BAI, KONBIT la ak MOLEGHAF, denonse kreyasyon dèyè do lalwa konpayi sa a, lè y ap konsidere manman lwa peyi a, nan atik 268-3, rekonèt se sèl lame d Ayiti ki gendwa fè zam ak minisyon nan peyi a. Alòske nou konnen pa gen lame nan moman an. Lame ilegal Jovenel la paka fè sa alewè pou yon konpayi prive.

Nan sans sa a, KONBIT la, MOLEGHAF ak alye sezi BAI kòm kabinè avoka ki pou reprezante yo legalman nan kad dosye sa a, paske yo deside ale devan tribinal pou jije kriminèl san fwa ni lwa sa yo, ki vle fè zam ak minisyon anndan peyi a, pou alimante gang ame nan katye popilè yo k ap simaye dèy toupatou.

BAI, KONBIT la ak MOLEGHAF ap pwofite entèpele tout moun ki konnen aklè kad legal sou kesyon fabrikasyon zam nan peyi a, pou pozisyone yo prese prese sou deriv sa a. Epi entèpele responsablite laprès ak òganizasyon Dwa Moun yo, espesyalman RNDDH, pou ede fè limyè blayi sou kesyon sa a.

BAI, KONBIT la ak MOLEGHAF ap fini pou mande popilasyon an rete ak je li byen kale pou li pa pran nan konplo k ap prepare kont li an. Pa dwe gen eleksyon ak Jovenel nan tèt peyi a. Modòd la se : depa Jovenel, tranzisyon ripti, pwosè petwokaribe a ak pwosè masak yo, bonjan mezi pou soulaje popilasyon an. Epi, eleksyon pou boukle tranzisyon an.

Pou otantifikasyon
Olriche JEAN PIERRE / dirijan KONBIT la

Liliane Pierre-Paul éléments Aller à la galerie de Liliane Pierre-Paul